Aslak Moe blir ny teatersjef ved Teater Vestland

Aslak Moe tar til i jobben 1. januar 2026, når kontrakten til konstituert teatersjef Kristina Kjeldsberg opphøyrer. — Styret ved teater Vestland er særs glade for at vi no kan ønske Aslak Moe velkommen til teateret som vår nye teatersjef. Moe har brei erfaring, og han er solid på det kunstnariske samt har den leiarprofilen vi såg etter. Moe si breie kunstnariske erfaring gjer at han er særs godt rusta til å vidareutvikla teater Vetland si rolle både lokalt, regional og nasjonalt, seier styreleiar Rasmus Mo. Moe fekk tilbod om jobben etter ein grundig prosess, og han tar fatt på eit innhaldsrikt åremål der Teater Vestland mellom anna skal markere 50-årsjubileum i 2027. Han kjem frå jobben som husdramaturg ved Det Vestnorske Teateret. — Det er ei stor ære å få tilbod om stillinga som teatersjef ved Teater Vestland, som eg har hatt eit spesielt forhold til heilt sidan eg reiste på turné som musikar med framsyninga «Rasmus og Juni» på teaterbåten Innvik i nyttårsstormane i januar 1993, seier den påtroppande teatersjefen.— Sidan har eg vore tilbake fleire gongar som regissør, dramatikar og dramaturg. Kvar gong har eg då hatt gleda av å arbeide med dei to faste skodespelarane på teateret, som eg meiner er blant dei beste i landet i sin generasjon, seier Aslak Moe, som har programerklæringa klar: — I den tida eg får leie Teater Vestland, vil eg at det skal vere eit sant folketeater, som skal berike publikum med unike opplevingar dei kjenner seg igjen i. Somme tider kjem vi til å spele teater på nye arenaar, og somme tider kjem scenen til å vere befolka av andre enn skodespelarar. Mykje av innhaldet kjem til å komme frå regionen. Det blir mykje musikk og humor, men òg stoff til ettertanke, seier Aslak Moe.